شاعرات من الباديه

[احمد السندي]

شاعرات من الباديه




هدايه العطاويه

حين حالت المسافه بينهما وصعب عليها الوصول قالت:


قلبى كما شيهانةٍ بيضهـا فقـش = المـحّ راح ولا بقـى الا قفوشـه
وآصاحبي صيده دقاق المها العكش = وله عادةٍ في كـل ليـلٍ يحوشـه
والله يالولا الدرب من دونهم عفش = ودرب الخلا ما ينوطي في عفوشه
لا فزّ فزّة واحـدٍ موحـي ٍ وقـش = يخاف من مخلاب شـيٍ ينوشـه

ضحيَّه الحماد

من شاعرات القصيم وبالتحديد رياض الخبراء تزوج زوجها
ابراهيم الدواس من امرأه اخرى ومال اليها كل الميل متناسيا عشرته مع زوجته الاولى ..
فقالت له ناصحه:


لا تعـــاف العدِّ يجذبك الغديري = والمـطر مــادام للي يشربونه

وكانت تقصد بذلك ان الغدير لا يوجد الا بموسم الامطار ولن يدوم لك كالعد
وهو البئر دائما .
وحين حدث خلاف عائلي وكانت هي احد اطرافه قامت بأستشارة ابنائها
بهذه المشكله وكان لكل منهم رأيه فـقالت :


دوّاس ياجبرتي يامالي الغــالي = ياما عيوني وراكـم ماتردونه
قال اصبري والزمن لا بد ميالي = والـنار تطفا الى قامو يرشونه
والا عبيـّد وقف في وجه عذالي = حلف وحرّم على امي ماتطبونه

وقالت تخاطب ابنها محمد :


محمد متى تكبر وتبني لي البيت = والا تنهـّج مع طريق الربوعي
ابــوك يشناني وانا مـاتردَّيت= ولا ضهته يوم سـوق الدفوعي

ايضا هذه شاعره من بني لام حين توفي زوجها وكان شجاعا
لا يريح مطيته من كثرة الغزو ,,, واخذت اخوه بعد وفاته ......
ولـــكــن ....... قالت !!!!


ينلاع قلبي كل ما اوحيت طرياه = كما يلوع الطير شبك الحبايل
أخذت اخوه ابغى عوض ذاك من ذاه = البيت واحد من كبار الحمايل
الزول زوله والحلايا حلايـــاه = والفعل ماهو فعل واف الخصايل

وهي اطول من ذلك فأضمر زوجها هذه الابيات واثبت لها العكس ثم
مدحته بابيات اخرى .

شاهة العبدالله العتيبيه

سكنت الزلفي و ألفت حياة الحضر فكرهت زوجها المطيري حسين الدويش
ورفضت ان ترجع معه للباديه فقالت تهجوه:


ياحسين مااحفينا عليك المراسيل = ولا لك خطبنا يامروَّي السلايل
ولابك على اولادالجريسي تنافيل = وساع الصحون مشعلين الفتايل

شعاع الاسلمي

عندما زوَّجها ابوها لبدوي رحال وكانت لاتريده
فأخذت تتوسل لوالدها قائله


لا يا يبه يا بعد حيي مـع الميـت= إصبر علي لو كسوتي بالديونـي
يا بوي من كثر المراحيل مليـت=البـرد والمجهـام زود جنونـي
يا بوي في عمري شقيت وتشقيت= يا بوي ما قوى للرحيل ارحمونى


مويضي البرازيه المطيريه


اللي يتوه الليل يرجي النهارا = واللي يتوه القايلة من يقديـه

و كانت مويضي تغني فأرسل الحاكم من يوبخها لعدم العودة مجدداً للغناء:


ياسّعد عينك بالطرب يالحمامــه = ياللي على خضر الجرايد تغــنـين
عزي لعينك وان دراى بك سلامه = خلاّك مثلي يا لحمامه تــونـــين
كسّر عظامي كسّر الله عظــامه = شوفي مضارب شوحـطه بالجاجـين
وأن كان ودك بالطرب والسلامـه = عليك بالفرعه ديار الوداعـــيــن

حصه العنزيه

تذكر جمال لحظات لقاء الحبيب في الخيال.... اما الواقع فلم يحدث


ياحلو رص الروح بالروح للروح = متوالفينٍ كلهم لا بلينا
مالي بتفطين المحبين مصلـوح = بالذكر والا عن كذا مادرينا
قلته من نوع التماثيل ومزوح = مالى عشير ولالهذا مشينا
لوكان باب العشق للناس مفتوح = نحمى شرفنا مع رجال علينا

بنت أبن رخيص من شمر

مات ابوها وباتت ترفض الزواج بحجة انها
لا تريد الا رجلا بمعنى الكلمة ويتحلى بالشجاعه
فـارسلت هذه الأبيات لعمها (( شفاقة )) تقول :


يا راكب فوق لحـّـاقه = حمرًا تقل واشعة دمي
اسلم وسلم على اشفاقة = والـلاش لايرسله يمي
حلفت انا ما اخذ العاقة = لو آكل العمر عند أمي
إلا لمن يحتمي الساقـة = لا درهم الجيش وألتمي

الشاعره مداهن في رثاء زوجها


نطيت رأس الرجم واوميت بالخمس =واقول ياهجر النيا وين خلي

خلي عقدني عقدتين بلا لمس =وانا عقدته عقدة ٍ ماتحلى

كان أمس مثل اليوم واليوم مثل امس =وان كان باكر مثلهن زاد غلي

وهذه شاعرة اخرى مجهوله ترثي اهلها وتقول :


هنيكم يااهل القلوب المريحه =ماالوم عيني لو جرى دمعها دم

ابكي هلي أهل الدلال المليحه =اخواني اللي اذا بغوا لازم تم

يالعبدهاذي من حكايا الفضيحه =خل السهر لي وانت يالعبد قم نم

من أول نأمر تجي بالذبيحه =واليوم ياعصر الندم صرت لي عم


وقالت شاعره مجهوله


كان أنت في دو الخلا تمتنيني =فأنا تراني كل يوم أتمناك
وإن كان بالخافي تجر الونيني = ونيني أكثر نعنبو بطنن أضناك
حبك حرم عن كثرة النوم عيني= ريفي مراعاتك وشفي بطرياك
لا عاد عرف ٍ صار بيني وبينك =أخاف حبك يوردنى حبل الإدراك

ولها ايضا

قصيده تتراجع فيها عن الحب بعد كبر سنها:


طرد الهوى عقّلت دونه ركابي =لو كان ماعلقتهن ياصلنه

ادور الغفران باتلى شبابي =والاّ اوله قد فات مافيه جنه

الحب في ماضي شبابي سطابي =لزوم تظهر شارته لو نكنه

يدري به اللي صايبه ماجرابي =يابين شاراته على اللي مشنّه

بويتله الروقيه

تتخيل منازل اهلها وتحن اليها:


عديت رأس(جويّ) وقت الغطاليس =واشوف شوف مايشفونه الجن

اشوف عفر حسين مثل المقابيس =وهو يلاوي مهرته مابعد عن

واشوف في نجد طوال النسانيس =واوحي الحوير يرضع امه بعد حن

واشوف جربوع تطقّه قرانيس =عني على قدّ النويع اذا اهون


وشاعرة رأت من زوجها مالايعجبها فقالت:


ياشوق ماتطلقن واجزاك =عدك بنا عامل طيبى

يوم اني عيني تبي لاماك =ماطعت انا كل خطيّبى

واليوم عيني تبي فرقاك =دايم دموعي على جيبي

تلقى العوض عاشقه تشهاك =والقى عشير يهلي بي

كنه الشمريه

وتقول مخاطبة اهلها:


لعيون من قال لعيونه =يجري اخلاف الردّيّات

هذاك يابوي مادونه =لو المواشي قليلات

ليا درهم الجيش ينخونه =يوم الركايب حفيات

نوره بنت هطيل الشمريه

نوره بنت هطيل بن خالد الزريقي من العطون من الجعفر من شمر ,,,,
كانت مع ابل والدها ومروا عليها اهل ركايب واسالوها عن اهلها وقالو يمكن صلبه فقالت هذه القصيده:-


يايبه أهل الركايب نشــــدوني = حش قلبي يوم قالوا ياصلــــــبيه
لعن ابوكم بحرو وسم العطوني = لعن ابوكم والله اني ضيــــــغميه
كانكم بالوسم واهله تجهلوني = نوخوهن عند حامــي الونيــــــــه
يالركايب لاتهجن بالعـــــفوني = ياحســـــيف فدكن كل ضحــــويه
والله لنشد عنكم ياما تعرفوني = ماركب ركابكم كـــود الدهــــــيه
كلمة الحقران علي ما تهــوني = ماني من صليب واصلي شمريه
الضياغم عزوتي مايرحمـــوني = يوم جلب الروح باســواق المنيه

صالحه العيسانيه العتيبيه

رات أخاها (غازي) وقدبانت عليه امارات عشق احدى الفتيات وكان ينشد قائلا...


يامرحبا ياللي على بيتنا مر =رد السلام ولامعي فيه حيله

يامرحبا عدة حصى كشب واكثر=وعدد جراد طاير من مقيله

ياحلو زوله يوم لبس المشجر=ياطى بمصبوب القدم في شليله
فلامته أخته (صالحه) في هذه الأبيات....

انهاك ياغازي عن الحب الأقشر=انهاك عن درب الهوى وتغديله

خل الهوى يامال جوع المجدر=ترى الهوى ماهو خطاة الحليله

ترى الهوى حسك الوبر حلوة الدر=ليا بركن حيرانها بالسليله

ترى الهوى رمح على حارك اشقر=اللي على الركاب يكسر شليله

ترى الهوى عزمة ركيب الى مر=عن بيت خمع ماينشط مقيله

خل الشحم والسمن للربع يكثر=مع منسف داف عليهم تشيله

من ضيننا والا فضين المتجر=عطهم ثمنها نقد والا محيله

ماهيب بنت اللي نعوله لها كر=اللي على متنه مدافق صميله

[احمد السندي]

نوره الهوشان الرشيديه

هذه القصيده المشهوره وكانت تسكن عين الصوينع ومرت على مزرعه طليقها
فوقفت تنظر الى زرعه ومعاويده :


ياعين هلي صافي الدمع هليه =والى انتهى صافيه هاتي سريبه

وياعين شوفي زرع خلك وراعيه =شوفي معاويده وشوفي قليبه

لو مرني في بالدرب ما قدر أحاكيه =مصيبة ياوى والله مصيبه

اللي يبينا عيت النفس تبغيه =واللي نبيه عجز البخت لا يجيبه


محاورة بين الفارس الشيخ عقاب بن سعدون العواجي وبين إحدى نسائهم كان لها زوج وحصل على غزو الشيخ عقاب معركة قتل فيها بعض من رجالهم وكانت هذه الفتاة تترقب الخبر وتتلهف على محبوبها عسى ان يكون سالم وتوجه السوال للشيخ عقاب :


ياعقاب ياحبس الضعن بالققاء الشين = ياللي حريبك بالهزيمة يمنا

عينت ذيب الخيل يوم الأكاوين = نور العيون غيبته الشمس عنا

هو سالم ولا رموه المعادين = ياعقاب خبرني تراي اتمنا

فاجابها الشيخ عقاب بهذه الأبيات يمتدحه فيها وموضحاْ ماجرى في هذه المعركة :


يابنت ياللي عن حليلك تسألين = حنا لنا حي يسالون عنا

خمسة عشر ليلة على الوجه مقفين = نزور شقح بلأباهر اتحنا

وشفنا اهل البل شاربين الغلاوين = من دون وضح للحوير تحنا

جونا ثمانميه وحنا ثمانين = مثل المحوص الشلف منهم ومنا

وبانت رديتهن وشفت الرديين = وكل عرفنا عزوته يوم أكنا

ليتك اتراعي ياعذاب المزايين = يوم ان عيدان القنا يطعننا

منا حليلك طاح بين المثارين = في ديرة فيها الأوضيحي تثنا

ومنهم جدعنا عند شوقك ثلاثين = كم خير من راس رمحي يونا

في ساعة ٍ فيها تشيب الغلامين = وانطح انحور الخيل يوم اقبلنا

ياما نقلت الدين واوفيت اللدين = وحريبنا في نومته ماتهنا

ارسي لهم يابنت وانتي تعرفين = ليما حمام النصر رفرف وغنا

واردها والحق اربوع مخلين = بوجيه قوم يطلقون الاعنا

عادتنا نخلي سروج المسمين = ونروي احدود امصقلات اتحنا

وقلايعي من نقوة الخيل عشرين = قبا ولافيهن تبار ودنا

ارسي كما فارس بني عبس راسين = وانا زبون الحرد حامي وطنا

الشاعرة غزيل

من قبيلة تميم من سكان القصيم تتغزل في معشوقها بلعوس :


واتل قلبي على بلـعوس = تلة ركاب المقفـــين

أقفى بقلبي يدوسـه دوس = ياليت ماهله دياحين

اشرية لو ينشري بفلـوس = لو يزعلون القـــريبين

يفدا عشيري عرب مدهوس = وعويشه والجداعين

غليم يكسب النامــوس = ويكثر الهيل بالصـين

الدقيس الجميليه

كانت تسكن وقومها في جوار مانع بن سويط شيخ الظفير وعشقها اخاه فقام بطردها مانع
هى ومن معها من قومها فقالت :


يالله عسى ماتكره النفس خيره = ياوالي القدره عليك التدابير
اللي فرق بين العشير وعشيره = هو له وانا ليه ولي المقادير
وراك يامانع تبتن بجيره = زودن على تلطيخكم بمالعايير
انا صليبيه ولاني نحيره = وانتم نحايركم رقاب المناعير
حنا صليب ولاعلينا تحييره = عاداتنا ننزل خلاف الدواوير
مانع اذا ركب الجواد الظهيره= ماله مثيل يعلم الله سوى الزير
زير العراق اللي ربى بالجزيره = شيخ كبير ووافي بالتشابير

الى ان قالت :


والله لا ابدل دارهم لي بديره = نتبع مزون ماشيات المحادير

و حين رحلت عن الظفير ارقبت في ذلك الرجم وقالت :


عند الضحى عديت رأس عنقور = اشرف على راعي العلوم الدقاقه
ياونتي ياما بصدري من الجور = ونة ضعيف ضاهدينه رفاقه
يايااه شفي واحدن من هل الهور = هو عشقتي من ناقلين التفاقه
غديت له عوق وهو صار لي ثابور = والكل منا صار شوفه يعوقه

وسمعتها امها فرق فعذلتها بقولها:


برق مصد عنك لو كان به نور = بالك تخيله لو ربيعك شفاقه
ترى الرجال ابهم تمازيح واغرور=ومن قبل بخصه لا يجي لك عشاقه

فردت عليها الدقيس بقولها :


من لا استشارك لاتبدي له الشور = ومن لايودك نور عينك فراقه

وذهب هذا البيت مثلا مشهورا الى يومنا هذا .

الجازي السبيعيه

كانت يتيمه عند عمها رديني فزوجها من امير المجمعه ابن عسكر

على غير رضى منه فأكلت سما وماتت وكانت قد قالت قبل موتها :


لقيت بأكل السم ياعم راحه = اخير من رجل بليتن بلاماه
شفي سبيعي بتالي طياحه = اخير من قصر بن عسكر ومبناه
ان مت حطوني بوسط البياحه = قبري على درب المظاهير تاطاه


مويضي بنت زعيفر العتيبيه

عتيبه كانت تعشق رجلا فرفضت الزواج به لأنها تعتقد انه لايرغب الزواج بغيرها ولكنها فوجئيت في اخر الأمر بنبأ زواجه من فتاة غيرها فعابت عليه عدم وفائه وأنشدت الأبيات التاليه تلومه :


ياسعود يوم أنك لحق العزيب=لاوهنيك يالمقاطي هنياه

انته تدورلك بكار ذهـيــب = ونا ذهيبي ضايع وين ابا القاه

اعوي توالى الليل كني صويب= كني صويب يسهر الناس بعواه

عيني تخايل كل نجم يغيب = الليل كله بس اهوجس بطرياه

قالواتطيب وقلت والله ماطيب = يافري مولع القلب فرياه

يفدى وليفي كل قرم تعيب = وشيوخ برقا كلهم من فداياه

ويفداه ابن هندي مجري الرعيب = ولو كان شيخ والمراكيب تناصاه

ويفداه ابن سحمان سقم الحريب = اللي نطالع ظلم مع درب شلفاه

السود من عندي تنصا صحيب = اللي فهق حوضه وقدم ظماياه

هيا بنت عيادة الحربي

قالتها في مدح زوجها / مبشر بن مرزوق المزيني الحربي الذي كان له من صفات

الكرم والجود الشيء الكثير رغم حالته المادية الضيقة :


يامل عين ٍ حاربت سوجة الميل =عـلى عشيرٍ بالحشا شب ضوّه

عليك ياللي طبخته نصفها هيل =اللي سعى بالطيب من غير قوّه

المال ما طيّب عفون الرجاجيل =والـقل مـا يقصر براع المروّه

يا عنك ما حس الرفاقة ولا قيل =ذا مـغـثي ٍ مـا ينزل حول جوّه

لـه عـادة ٍ يـنطح وجـيه المقابـيل =هـذي فـعـوله بـالمراجل تـفوّه

أجواد نسل جيل ٍ ورا جـيل =الـطيب فـيهم مـن قـديـم ٍ وتـوّه


شده بنت هملان الشمري

أحبت الشاعره رجلا من بني عمها حبا شديدا حتى أثر غرامها به على صحتها فمرضت وهزل جسمها وأشرفت على الهلاك وراع أهلها ما أصابها فسألها أخوها عيد عن سبب انحطاط جسمها ومرضها الخفي فأجابته بقولها:


بي المرض الخفي ياعيد=اللي على الناس يدعابه
ليا صار لك صاحب ٍ وبعيد=وإلا عشير ٍ إيعيا به
أنا هوايه ماهوب رعديد =قرم ٍ على القوم يعدابه

احدى بنات السلقا من العمارات من عنزه.
وهي مجهوله .... تتغزل بحمود بن رميزان ..


يازول أبويه هـلا يـاحمود = وان جيت مـن أقصى العرب عانـي

يـفـداك أخـويه وابويه العود = واللي لنا مـن العـرب داني

ويفداك من حودروا للسوق = نجعة هـيازع وشملاني

ويفداك مـن علق الـبـارود = المطر في والمضياني

وضحاء المشعان

وهذه الشاعرة من حرب عندما تتغزل
بسعود البسيس وتجعل الناس فداء له
ويقال ان حبهما استمر عشرين عاماً وكان بنو عمها قد منعوها من الزواج منه
تقول :


يا ونتي ونة قعود الظغينه = ليا زفة المعصير واللي يحده
لا ركبته خطو الهنوف الحزينة = وقالت حلال القوم ماشي ٍ مشده
ويفداه من حط العصا في يمينه = ويفداه من يركب بوسق الاشده
ويفداه من باب الحسا للمدينه = وماحده البحرين لقصور جده

وقد تحسفت وندمت على ذلك بان جعلت كل من ذكرت فداء له و تراجعت وقالت هذه الابيات:


قاف بنيته يالنشامى غبينة = عسر عليه بالحواضر مرده
هذا الهوى اهل الهوى عارفينة =دايم على درب الرزالة يحده

ولها ايضا


ياهيه انتم اهل البكار الضمر = دارو عليهن يا اهل العجلات

ردوا سلامي لو انتم من شمر = ردوا سلامي لحامي الوندات

قولو عشيرك بالحديد يسمر = ونشهد انه مدرك موات

أنا اشهد انك ياسعود مقمر = تعطي هروج وتقفيه زلات

وانشدت أيضا هذه القصيده في من تحب وهو من نفس القبيله ويدعى سعودالبسيس
عندما تقدم لاهلها بالزواج منها ومنعوه عيال عمها بسبب عادات التحجير .....
وتقول وضحاالمشعان لفايز الفراج الذى كان ينهاها بعدم القصيد بمعشوقها :


يافايز الفراج قلب العنا ماج=و تبينت باقصى الضماير فجوعه

عيني بها هزم ولاج ولواج=عيني تنثر يالسنافي دموعه

تشبه لها غرب على جال هداج=يوم السواني يالحبيب تزوعه

أقنب كما ذيب على جالهم داج=اليا رفع صوته تعاوت ضلوعه

على عشير ما مشى درب الأعواج=ولا هو من اللي قاصرات بتوعه

ما حطني يا محتمي الحرد مسهاج=قوله صحيح وعايزات طبوعه

و الله ما انسى صاحبي يا بن فراج=لو الشجر كله تصرم جذوعه

نزيلة الشمريه


من عقب ماني صايمه بس اصلي =اعرضت انا من حر شي جرالي

تسعين لحية كلهم دنوة لي =عوجان الالسن ذبحوا هم قبالى

مافيهم اللي ذل والا استذلى =ولافيهم اللى يتقي بالجبالى

عيالنا بالشمس ماهم بظلى =وحريمنا دجن بليا رجالى


طفله بنت مشرف الجبلي الشمري

رغبت الشاعره بالزواج من أبن عمها شباط بن مرزل الجبلي ،فقالت هذه الأبيات تعبيرا عما تكنه له من محبه حيث تمكن حبه من قلبها وأصبحت لا ترى له مثيلا في البقاع التي تسكنها أو تنتقل إليها ولحبه العميق أحبت كل ما يمت إليه بصله


حبك بقلبي بنى له سور=كان تفهم العلم وتطيعي

وأمن الحسا إليا فريق اضمور= معطي بحبك ولا بيعي

سمي خلي مضى له دور = قبل ليال المرابيـعي

هنالك شاعره شمريه لم استطع معرفة اسمها
قد عشقت الفارس والشيخ حمود الحميداني عشقا بريئا عفيفا فقالت :


الهجن غادن لهن جضّه = يتلن حمود الحميداني
ياشوق غضروفه غضه= ماهرجت كل ديقاني

وقالت بعد ان رحلوا عنهم


ياحلو مقطانكم يامطير = مير البلا كان شديتوا
مطير يامشبعين الطير = في سهلة وان تناخيتوا

فأتهمها قومها بريبه وقال شاعرهم


يابنت عدك عليه ورود = عطن عليه الحميداني
روى صراته غضي العود = واقفى عن العد روياني

غضبت وقالت


شمر عسى حضكم مقرود= والله وبالله ماجاني
عساه يلحاكم بن سعود = بسيوف بيدين غلماني


وبعد مده جائها خاطب فقالت لأمها

يايوم (يا أمي) ماريد كود حمود = اللي ذبحني وانا حيه
يفداه ابويه واخوي سعود = واللي بعد من دوانيه
ويفداه من ينقل البارود = واللي تحيزم بشبريه
ويفداه من يجذب البالود= واللي وقف له على الطيه

[احمد السندي]

كنه الرماليه

عاد الغزو ولاكن لم ترى زوجها عبدالله؟


يهل الركايب وين عبدالله= لاو الله اللي غدا بالكون رجالي
يبطي عليه الصحن والنجر والدله= وتبكيه رملا عجوز مالها والي
وتبكيه حمرا نهار الكون منتله= يوم اشهب الملح غاد ٍ له تزلزالي
ياقلب اصبر على ماجا من الله= كم واحد لاعته بقعا وهو غالي

وقالت ايضا :


باقي العرب موتهم تخفيف = مار البلا موت عبدالله
مرحوم يا مهلي بالضيف = يامكثر الهيل بالدله
إذا مسك زينة التوصيف = الدم من مضربه شله
ياما صفقهن ووردن عيف = وياما حمى كل منتله

هيـا الحربيه

هيّـابنت عياده الرشق من بني سالم من حرب متزوجة من رجل فقيروفي يوم تخاصم مع والدها وأخذها من زوجها دون رضاها وفي احدالأيام قالت هذه الأبيات فسمعها والدها فأعادها لزوجها


يا مل عين ما اهتنت نومة الليل =على عشير ٍبالحشـا شب ضوه

عليك ياللي طبخته نصها هيل =اللي سعى بالطيب من غير قوه

المال ماطيّب عفون الرجاجيل =والقل مانقص براع المروه

رجال ماحـس الرفاقه ولاقيل=ذا موذي ٍمايانـّزل حول جوه

وله عادة ٍينطح وجيه المقابيل=هذي فعوله بالمراجـل تـفوه

أجواد نسل أجواد جيل وراءجيل=الطـيب فيهم من قديم ٍ وتوه

في مساجلاة شعرية بين ( مويضي ) وأختها ( بنا ) تمدح زوجها وتنتقص زوج اختها مويضي :


شوقي غلب شوقك على هبة الريح = ومحصل فخر الكرم والشجاعه
ركاب شوقي كل يوم مشـاويح = واذا لفى صكوا عليه الجماعه
ياالبيض شومن للرجال المفالح = لا تقربن راعي الردى والدناعه

فأجابتها اختها مويضي تقول :


ماهو بخافيني رجال الشجاعه = ودي بهم بس المنتاعير صلفين
أريد مندس بوسط الجمــــاعه = يرعى غنمهم والبهم والبعارين
واذا نزرته راح قلبه رعــاعه = يقول : ياهافي الحشا ويش تبغين
وأن قلت له : هات الحطب قال طاعه= وعجل يجي بالقدر هو والمواعين
لو اضربه مشتدة ٍ في كـــراعه = ماهو بشاكي ولا الناس دارين

جوزة و سمرا .. بنات محمد القنيني

حوار جرى بين شقيقتين من أهل بادية بني عبدالله المهد ثم إنتقلن للسكن في مدينة جدة .. وجاش حنين البادية في" جوزة " فتمثلت قائلة الأبيات التالية :


يا بوي واوجدي على الصبح مطلاع =وجد الطوايا أللي على الما حيامي

داجن و راجن ثم راحن مع القـاع=ما قدمهن غير الدرك و المظامي


فأجابتها سمرا :


يا بنت حطي فوق شاهيك نعناع =كبي البداوة و البلش و الزيامي

ترى البداوة ما تجي لك بالأسناع=عسرة ولا تبني لأهلها سنامي

رحتي تجيبين الحطب و البهم ضاع=واليا الحمير إملاوذة بالظلامي

وإليا رجعتي للعرب عقب مفزاع =وأليا ضيوفك مشتهين الطعامي

موضي العبيدي
قصة موضي العبيدي شاعرة الكويت التي عاشت في النصف الثاني من القرن الماضي والنصف الاول من القرن الحالي في زمن الشيخ مبارك الكبير وحياة هذه الشاعره في حزن وبؤس دائم بسبب فقدانها لأبنيها، أحدهم أخذه البحر منها والثاني تكفلت به الصحراء.ابنها الأكبر عبدالعزيز فقد في رحلة الغوص حين غرق في قاع البحر أثناء بحثه عن اللؤلؤ ويوم رجوع السفن للكويت كانت تنتظر على الشاطئ حالها كحال كل اهالي الكويت لأستقبال البحاره تنتظر ابنها ولم يطل الانتظار فقد رأت النوخذه يوسف الفهد وعندما جاءت تسأله حتى بادرها أحد البحارة بالخبر المحزن وقالت ترثي ابنها بهذي الأبيات :


يابو سعد عزي لمن ضاعت أرياه = قلبه حزين ودمع عينه يهلي
يسهر طوال الليل والنوم ماجاه = في مرقده كنه بناره يملي
عـلى وليف عذب الحال فرقاه = الطيب اللي للرفاقه يهلي
مـدري درادير أزرق الموج ودّاه = والا كلاه الحوت ياكبر غلي
ياليتني دمـيت بالهــير وياه = موج البحر فوقي وفوقه يزلي
الله يسود وجه يوسف وجزواه = ماذكر دمعي وسط حوشه يهلي
جتني هدومه بعد عينه مطواه = لاوفق الله محمل جابهن لي
ليته ورا سيلان والهند مرباه = وأرجي يجيبه لي شراع معلي
البندق اللي عندنا له مخباه = نقّـالها عـقـبه عينه يولــي
وصلاة ربي عد ماحل طرياه = وأعداد ماسار القلم بالسجلي

وبعد مرورخمس سنوات على فقدان ابنها الاول كان ابنها الثاني مع الشيخ مبارك في حرب الصريف وكانت تنتظر رجوع الأبن لكن قرينيس الرشيدى احد رجال الشيخ مبارك كان اول العائدين ونقل لها خبر مقتل الأبن واشتعلت النار مره ثانية ورثته بهذي القصيدة :


قلت آه من علم ٍ لفا به قرينيس = ياليت منهو ميت ما درابه
علم لفا به مرس القلب تمريس = والنار عجت في الضمير التهابه
والنوم له عن موقع عيني حراريس= والحنظل الممزوج زاد بشرابه
علي الذي قفا عـلي ضـمر الـعيس = واليوم ما أدري وين حد لفا به
نصـيت بيته قـلت له ياقـــرينيس = وين الحبيب وقال ماعلمنا به
اقفى مع البيرق بحرب السناعيس = وان سلمه رب المخاليق جابه
رديت من كثر البكاء والهواجيس = دمعي كما وبل نشاء من سحابه
ياالله يافكاك حبل المحابيس = تفك لي مـحـمـد من صــوابه
بجاه محمد ويعقوب وادريس = عسى طلبتي عند ربي مجابه
واعداد ماهبت هبوب النسانيس = على النبي صليت هو والصحابه

مرسا العطاوية

وتقول الشاعرة عندما تزوجت برجل من الحاضرة
وفقدت نسيم الصحراء العليل وبيوت الشعر ومساريح الأبل
وشاهدت يوماً من الأيام أهل ركايب مروا بها في طريقهم إلى البادية


لاوهنيك بالهنا يابو مرداس=مالوّعوك مدرهمين المطيه
القلب كنه يشرعونه بالأمواس=من طين حضرٍ حوطوا به عليه
لاوهني من نط مزبور الأطعاس=ومتع نظر عينه بنجد العذيه

ولها ايضا :


ياجرقلبي جر غرب على بير = على ثلاث ابكار فيهن زرقا
ساعة يصبنه الى هن محادير = تحرفن ابسرع والغرب يرقا
ويالجتي لجت ثلاث على ضير = اكبودهن من حر الاخلاج حرقا
على ولدهن باختلاف المقاهير = لاعشو الروقه على سرح برقا
عليك يامطلق صخاف المعاشير= يوم المناسر تالي الليل شرقا
الى شبت النيران مثل الفنانير = يضوي عليهن يدرق البيت درقا
هرجه على كبدي حليب المصاغير= وهرج العرب غيره على الكبد عرقا

حجت الشاعرة مرسا وسمعت بائع اللبن بمكة ينادي بأعلى صوته ( لبن لبن ) وعلمت أنه يبيعه للناس فاستغربت أن يباع اللبن لأنها لم تعرف أنه يباع بل يعطى للطارق بلا ثمن لذلك سموا الإبل بعطايا الله فيعطون من لبنها لخلق الله ممن مر عليهم في بلادهم فقالت :


ياللي تنادي باللبن ما لنا فيه = عان اللبن في سد عبلة ملاوي

خشم الينوفي والحور بارك فيه= مرب خلفات عليها العطاوي

ومبهل وأبا الحيران كان أنت غاويه= مرتاع بدو ما تلاهم شواوي

ووادي الجرير إلى حدر من علاويه= وخشم الذنيبه والجذيب متساوي

ترى الدعيكه والحفاير حراويه= مرباع خلفات ترب المطاوي

تلقا مصلحة الدبش كلهم فيه= بالرجع اللي يذبحن الهواوي

وربعي ليا جاها المجني تلفيه= ريف الضيوف مزبنين الجلاوي

كل جواده مع نحي الذود تتليه= علط الرقاب معربات العلاوي

قمراالمرهوصه الدعجانيه

يقول المرهوصة الأستاذ عبدالله بن رداس أن لها جولات في الشعر إلا أنه للأسف الشديد لم يصلنا من شعرها سوى النذر اليسير إذا قيس بكثرة شعرها هذا وإن صحت المقارنه فلا نجد لها مثيلاً من شاعرات العرب بالعصور السابقة سوى الخنساء أو الأخيليه ولذلك لا يستغرب أن يوجد لها مقطوعات شعريه رائعه أو مساجلات مع فحول الشعراء لقوة بديهتها وسلاسة عباراتها.

كانت الشاعرة تسكن مع جماعتها الدعاجين شرق المذنب وكانوا مجاورين للفارس عبدالله الغميزي
( الغميز : من آل قويفل من بني العنبر من تميم وقد عرف رجالهم بالشجاعة والكرم )

وقد جرى بينها وبين الغميزي قصة غرام شريفه , قالت فيها قصائد غزلية رائعه , منها :


ياونتٍ ماسمعها الناس وأهلي= ماسمعها غير الولي يوم ونيت
على عشيرٍ يوم مد القدح لي= بكا وقال إني على الهجن شديت
قفا ودمعي فوق خدي يهلي= ماحدٍ يعوض عنه بالحي والميت
من عقبه امشي مل مشي الدبح لي= وزرت رجولي لاتوديني البيت
وزرا لساني عن محاكيك يسلي= وزرت عيوني عن مراعاك واغضيت

وقالت ايضاً :


الفدغمي عني هل الجيش ودوه= أقفا ودمعي فوق خدي سفايح
عليه وجدي وجد شالح على أخوه= يزعج عليه من البكا والنوايح
حطوه في قبرٍ وحيشٍ وخلوه=تحت الثرا ركزت عليه الصفايح
أو وجد من ربعه على الجال حدوه= أونس من الربع القريبين جايح
خلي بعيد والمداوير ماجوه= عسا على داره تهل المراويح
تسقي تراب اللي على الطيب ربوه= أهل المروه كاسبين المدايح

وقد شغف قلبها بحب الفارس عبدالله الغميز كما أنه بادلها بالمثل وربما كانت أكثر غراماً به وقد أخفت حبها في بداية الأمر على الرغم من الود المتبادل

وقد قالت فيه قصائد وجدانية عديده سأورد منها مقطوعات جيدة , وقد طالت مدة العاشقين ولم يزل غرامهما ينمو ويزداد حتى تزوجها وأنجبت منه رجالاً ذاع صيتهم فيما بعد وكثيراً مانجد لبنات البادية قصائد غزلية تتصف بالعفاف وسلامة الطوية في حب شريف وغزلٍ عذري بريء لايمس كرامة ولايخدش عرض.
منها :


البارحة جفني سرا الليل مابات= سهرت لين النجوم احدبني
عقب الذي ودنه الصيعريات= متى علينا ياهلي ينكفني

ولها:


وجدي على شوف زبون المقاصير= وجد المريض اللي علاجه تعصا
راع الدلال المتعبات المباهير= ريف الضيوف اللي لبيته تنصا

ولها :

ياطير سلملي على متعب النيب= طلق الحجاج اللي يحفظ الوداعه
اللي ضيوفه وسط بيته محاضيب=مارافق إلا كاسبين الشجاعه

ولها:


يامن لقلبٍ كل ماجيت اداريه= ويليه من بين الضماير يزوعي
زوعة خفوق الطير لاعاف راعيه=وعانق غرانيق غدن له اولوعي
ولن مسباقه جديد مسويه = تله وراح السبق بيده امزوعي

ولها :


يامرحبا في طارشٍ ساع ملفا=ترحيباً أحلى من لبن حم الأوراك
ابكار يرعاً من زهر نبت حلفا= يرعن من الحلفا ويرعن من الراك
ودي عليك اشكي الجفا عقب ولفا= من غيرك اشكيله الى أونست عجفاك

ولها هذه القصيدة تخاطب ابن عمها :


إن كان قلبك باينٍ به رقومي = امسح على القصة وتبرا مكاويه
وانظر لردف مل شط الردومي= وثليل اشقر فوق الأمتان كاسيه
مرخوص مني في جميع العلومي= الا الجسد واللمس خله لراعيه
خله لمن ينطح كبير الزومي= اللي يعرف الحق والفرض يديه
وإما أنت عندي غالياً ومحشومي= وادرا حساب الرب عن شن اسويه

ولها هذه القصيده التاليه :


ياقلب ياللي كل ماقلت له أنا هاد= عاده بلاه اللي من العام يقزيه
يالعين وان زاد العنا والسهر كاد= اللي بقا من تالي الدمع هاتيه
على عشيرٍ شاف طلعه بالأبعاد= لاهوب زيراني وأنا مقدر أرجيه
ياليت ساعة بالنظر يمنا عاد= أبادل الأفكار بالراي وأعطيه
صحيح ماقالوا قديمين الأجواد= كلٍ يدافع دون عرضه وعانيه
لعل عنوانه على روس الأشهاد= ومن موقف الحقران ربي ينجيه
ياونتي ونة خفا كونها زاد= ماظن تبرا من فؤادي مكاويه
رضيت في نفعه على كيف ماراد= لاشك حظه قاصراتٍ مداليه
حظه ربوضٍ يوم كاسبات الأفواد=طير السعد عيا نصيبه يباريه
من لايزيده رازق الناس مازاد= عيا يوافقني عسا الله يدنيه

ولها هذه القصيدة التي اشتهرت بينالأوساط الشعبيه وقد سببت للشاعرة قصة ظريفه مع امير الجبل رحمهم الله جميعاً


يامل قلب ٍمن هوى زيد مطروق = طرق الحديد ملين بالضويا
أمسيت قلبي في وأصبحت مسروق = وثورت في قلبي عميلٍ وعيا
يفدا عشيري كل برقا مع روق = واللي بعيد الدار واللي هنيا
ويفداه من يمشي على الأرض من فوق = واللي يشوفون القمر والثريا
ويفداه حضرٍ لجو العصر بالسوق= وابن رشيد اللي على الحكم عيا
وقالوا لابن رشيد : سبتك اذبحها !!
قال : ماسبتنى مدحتنى!!

* زيد وثلاب وغيرها من الأسماء المستعاره التي يستعملها الشعراء والشاعرات خصوصاً لإخفاء الأسم الحقيقي , يقول المطوع السعيدان


الليلة الجمعة وباكر ضحا العيد= عيد على لاب جعله يعودي
جعله يعود بغير شر على زيد = وجعله عليه من الليال السعودي
كل يساير صاحبه في ضحا العيد = وانا على غض الصبايا وجودي

قرينيه بنت فاضل

وهنا الشاعره تتوجد على حبيبها في الاسر:


فريّت واشورف الضلعان=فرّيت من بين خلق الله
انشد عن الارجح الدّيقان=هو حيّ والا نهج لله
اللوم كلّه على دغيمان=وحمود ومدغم وعبدالله
خلّوه في ديرة الشجعان=بنحور ربع لهم غلّه

قرينيه بنت فاضل


متى عل الله يهبّ الهيف=يومي بعشب الزماليقي
اذا نزلنا ليالي الصيف=يملا النظر شوف عشّيقي
لو يذبحوني هلي بالسيف=حلفت لاسقيه من ريقي
على النقا مبسمي ماشيف=مافتّشوه العشاشيقي
قلته على المزح والتوصيف=تفضاة بال عن الضيقي

وشاعره اخرى تقول في رجل عشقته:


ماتهارجن كود بعيونك=اهرج وهرجك على بالي
ان كان اهيلك يعذلونك=انا ترى السيف يحنى لي
ياليت من جوّد ردونك=من قبل قصاف الاجالى

مريفه السليطيه

ايضا تتغزل:


ياهذب ودّعني ترى الموت جاني=من مبسم كن العسل بين اشافيه
انا ذبحني واحد من اداني=العفو كيف الخال يذبح بناخيه

عشيبه بنت دغيم السليطيه

تصرخ قائلة:


واخانة القلب ياعمّي=عن لذة النوم قزاني
ياعيد لو نقّعوا دمي=مانساك كود انت تنساني

وضحا بنت السلات

تتغزل :


لولا الحيا ياناس لالحف ذلوله=الحف ذلوله عن ذواري الهبايب
من بعد سجّ البيد جات معلوله=لكنها مسقاة السّم رايب
زوله جميل وغير زوله فعوله=لاحلّ باطراف السرايا نهايب

في قرية الجهراء التي تبعد عن العلا 130كم شرقاً على تقاطع طريق حائل العلا المدينة تبوك
هناك جبل يسمى ( برد):

تزوج شخص ابنة عمه وجميعهم شعراء، وحدث خلاف بينهم وطلبت الطلاق منه، فقال طيب ولكن حتى يصغر برد، فردت عليه بهذه القصيدة وأنا لا أحفظ منها سوى بيتين فقط، معذرة:


يا بـرد ما تسمّح النية=لعاد أنا وأنت بجهادي
والشوق حطك وعد ليّه=وأشوفك بالكبر مزدادي

تزوجت امرأءة في قبيلة غير قبيلتها وكان اخوها يريد سرقه قوم زوجها وجاء ليلة قرب الحي فعوى كما يعوي الذئب فعرفته اخته وقالت تدله على مكان الابل :


يا ذيب لا تبعدك عنا المخافه =وتطرد الغزلان في القفر يا ذيب
البل تراها يم قصر النهابه=ما عندها الا لاعب الحل يا ذيب

فسمعتها عجوز وضنت ان الرجل صاحبها فقالت العجوز:


الذيب لا يعلق صوابك بنابه=ترى صواب الذيب ماله تطابيب

فردت المرأة


وحياة ابويه ما بدا من شبابه=اني عذيّه ما دخل جيبي العيب
واني كما عدٍ غذي ٍ شرابه=ما داهله بالقيظ حرش العراقيب


وهذه مساجله بين صمد بن نقا الروقي وزوجته منيره

يقول صمد:


تكفين يا بنت الأجاويد تكفين =تعيّني للعود عندك وساده
العود وده بالتطرف نهارين=لو انها ماهي للعود عاده
والا اكتبيها في رقبتي تجي دين=لين ان يأتينا ربيع وسعاده

فردت عليه زوجته منيره


العام تبغى لك من البيض ثنتين=ايضا وتبغى لك عليهن زياده
العود لا منه وصل سن ستين=يروح مخه مثل مخ الجراده
لا يقضي الحاجه ولا يقضي الدين=ولا عاد تقبل منه حتي الشهاده

جُريّه بنت صويلح المحقنيه العتيبيه

سافر اخوها واشتاقت له وقالت :


الليله امس داخل القلب هوجاس=هوجاس والهوجاس حرّق عليه
يقوله اللي ما مشى درب الأدناس=ولا قلبوه اهل العمال الرديّه
واجر قلبي يا جمل جر الامراس=جر المرس من قاعة العيلميه
واخويه اللي حال من دونه اليأس=ما عاد توصلنيه صفرا ثنيّــــه
اقفوا به الحكام قطّاعة الراس=يا جعلها للحي ما هي بِنِيًّــــه

وضحا العبدالله

من بادية السر فى وسط نجد تتغزل فى معشوقها ابن دويرج فتقول:


البارحة عديت بالمستقله=في راس مزمومٍ طويل البياحي
يايوه عزيني بدا فيّ خله=سدي على بعض المخاليق باحي
من يم قصر دويرج مدهل له=غليمٍ ينقل جديد السلاحي
اهلي مع اهله كلهم فدوةٍ له=يفدونه الفرسان واهل المناحي
والله يا لولا الخوف وادرى المذله=لا حط له بين النواهد مراحي

هيا الطلال


السد باح وبان ما اخفيت كله=ما ينجحد شيٍ على الناس باحي
على الذي ياخذ على الخيل عله=تكسرت عنده طويل الرماحي
والله يا لولا اللوم وادرى المذله=لاحط لي بين النصايب مراحي
وابني عليه البيت كله رضاً له=واذبح على قبره ردوم اللقاحي
الفٍ صباح الخير والفٍ مساً له=والفين ما بين المسا والصباحي
لعل من هو لامني فدوةٍ له=ولعلهم ذلفة هبوب الرياحي

وضحا الجنفاوي


انحت رحاك وخل عنك القهـاوي=شبابهـا بـا يسـر سنـام دفنـاه
اللـي لدقـة نجرهـا مايـداوي=من حيث ضامين الشواريب تنصاه
اللي ليا جو مضمريـن ومقـاوي=يلقونهـا قبـل يجونـه مـسـواه
ماهو على كيف النشاما غـلاوي=بشريه لو هو بالثمن زاد مشـراه

نفلا المسرديه القحطانيه


ابا ارفع صميل القرم حامي عقاب القود=اربـه إذا مـاراح يذكـر معازيـبـه
من خوفتي يظمى ليا درهـم الجلعـود=ليا عرضوهـن تختـخ عاوي ٍ ذيبـه
وحالي عليهم مثل حال ازرق مضهـود=وزادوا على حمله وكثـرت شواذيبـه
الله علـى مـاراك ياصاحبـي وتعـود=متى عوض الانضا من جنوب تلفي به

الاميره نوره الرشيد


ابكي هلي اهل العلوم المليحـه=ولا لوم عيني لو جرا دمعها دم
اخواني ابكي والقصور الفليحه=اخواني اللي لا بغوا لازمن تـم
ياما انتخوا باسمي ليا حل صيحه=اليا انتخوا بي كافر الجن يسلـم
اسمي كما نجم ضرب قاع بيحه=او الصواقع يوم للضلع ترجـم
نوره انا اخت الشيوخ الفليحـه=ابوي حاكم واخوتي صفوة الجم
ياحيف حايل فارقن ريح شيحـه=بذيك الشفايا تقل ماقيللـي سـم


صيتة التميميه

صيتة وكانت معجبة بأشعار سرور الاطرش فعشقته قبل أن تراه وصارت تنظم في حبه الاشعار ومن ذلك قولها:


تقول صيتة واعيوني سهيرة = أنا عيوني عن كرى النوم شرّاد
شفّي سرور ولا تمنيت غيره = على النقا ما يلحقن كل نقّاد
قلبي كما بير ٍتزايد حفيره = ذولي مصادير ٍ وذوليك ورّاد
يا ما حلا شوف العشير لعشيره = لا صار ما جا بين الاثنين ميعاد

وقالت فيه أيضا:


انا بوادي الرس داري ظليلة = وصويحبي يتلي المها بالصواهيد
ليته الا صاد المها عنه اشيله = أشيل انا عن صاحبي جملة الصيد
شفي سرور ولا اتمنى بديله = عليه ضيّعت الحيا والمناقيد
من لامني يلهم دقاق النثيلة = والا يطقّ بهامته نايف الحَيد


غزية العنزية

يحكي ان بنت عقاب العواجي العنزي وتدعى ( غزية ) فقدت أهلها ولجأت الى عمها ، وكان له أبن أحبته ، فسافر في طلب الرزق مع صاحبه يدعى( عيـــد ) فتغيبا قرابة الثلاث سنوات ثم رجع عيـــد وحده وكان بالحي رجل غريب يريد الزواج من هذي الفتاة غزية لكنه يعلم انها :سترفض طلبه لحبها لأبن عمها . وقابل عيــد وقال له لك عندي جمل ان اشعت ان ابن عم غزية قد توفي .. لعلها تتزوجني بعد ان تأيس منه فلبى طلبه وأشاع الخبر فلما سمعت بالخبر غزية أنشدت الابيات التاليه :


تعــززوا للي عشـــيره تـنوى = يم الشمال وحط حوران دونه
أقفى وخـلا له يتيــم يلوى = واليه عمام ليتهم يرحــمونه
فات الربيع وعشـب الاجراد لوى = واخانة الطرشان مايذكـرونه
ياعيـد اسالك با لولي كيف سوى = هو ميت وألا اهله يرتجــــونه

فأجابها عيـــــــد :


يابنت شوقك خابره ويش سوى = بالموس قصوا لك قصــايب قرونه
أتلى الخبر به يوم قبره يسوى = وخـام جديد بيــــــــــنهم يذرعونه
وعلمي برواي العرب يوم روى = بايسر ( نوى ) علمي بهم يدفنونه

وقيل أنها ماتت حزناً على ابن عمها بعد سماع شعر عيــد ولما عاد أبن عمها وسمع بالخبر وبما فعل عيــد بأشاعته وماتت غزية بسببه قتل عيـــد جزاء بفعلته .

عجايب الخريشا الصخريه

هذه القصيده للشاعره عجايب الخريشا وقالت هذه القصيده عندما حضر اشخاص لخطبتها واختارت ولد عمها سليمان حنيف الخريشا


قالت عجايب بنت مروي شبا الزان = حيث ان ابوي ناشدن عن خوالي
ابوي فكاك الضعن يوم الاكوان = واخوي حماي البكار المتالي
ما أريد انا باشا حلب وابن شعلان = ماني حليلتهم ولاهم ارجالي
ولااريد انا الجربا ولو ساق الاضعان = ولو جاب غرسات الحسا للشمالي
أريد انا ولد الخريشا سليمان= ذباح طوابير العساكر أقبالي

شاعره من المحينات من عنزه

شاعره من المحينات من عنزه كانت ترعى ابل اهلها فتعبت
وتمنت لو اغار عليها (دبي النجباني الشمري) وياخد الحلال
لكي ترتاح من رعي الابل فتقول :


يا شين ما تويق يادبي = على المحينات لك نوبه

يا دبي الزمل عذبي = هايج ٍ والهجر عيوبه

خل المخابيط تشتبي = والخيل والجيش له شوبه

وفعلا اغار دبي على اب المحينات فقتل دبي عند المحينات
فقال واحد من المحينات :


يا شين لا تويق يا دبي = على المحينات بالنوبه

الشمري طاح وانكبي = بالمعرقه علقوا ثوبه


الشاعره ذكر العنزيه

ذكر العنزيه تنخى اخوها لفعل المكارم وتقول له :


توي لقيت الهجن باكوارهن كيف =باكورهن ينسى هوى كل غالي

ياراكبين اكـوار حيــل مواجيف=حراير يزهــن جديــد الدلالي

حزة طلوع سهيل دنوا شواحيف=يا اهل النضا خوذا سواهيج بالي

لاطالت الفرجه يجيهن زعانيف=حيل يجفلــهن سمــار الظــلالي

لاصدرن من مارد عدهن عيف=بوسوطهن ما احلا وسوم الحبالي

يجفلن من قمع الحجار المشاريف=مثل النعام اللي حــداه الجفـــالي

يلفن رباع اللي يهلون بالضيف=مقلطة للضيف من كـل غــــالــــي

يا خوي يا ريف الهزال المناكيفيا مقلط للضيف حلو النوالــــي

دلال كما الغربان سود مهاديف=من كثر ماهي للسعاير تصالي

يا خوي وش ملهيك عن ديرة الريف=والختم تاكلبه عفون الرجالي

عوايدك تروي بها شذرة السيف=يا زين حسك في عقاب التوالي

فقد كان لاحد اجداده مرتب سنوي لدى احد الملوك

يستلمونه بعد التوقيع بخاتم يحمل اسم العائله ثم ان

اخاها واسمه فريح استنام واتكل على هذا الختم ولم

يعد يغزي ولا يكسب بيده ......

[احمد السندي]

نفلا الشعلان

تزوجت نفلا بنت ابن شعلان الامير محمد بن احمد السديري


ولاحظت بعض الجفا منه في اخر الامر ورأت انه يفضل

بعض زوجاته عليها فقالت هذه الابيات :

يا محمد عقب الغلا وش جاك =وش غير المذهب الزيني

كان انت زعل ٍ علي ارضاك=من شانك امشي على عيني

يوم ان قلبي بغى لاماك=حـرمت كــــل الشعـــاليني

واليوم بينت لي جفواك =تمرني مــــا تــحــاكـــيــنـي

وتقول ايضا :


يا محمد صبري على شانك=ومقابل الحضر يا خلي

ينفعني اقفاك واقبالك=حيث ان شوفك ربيع ٍ لي

واشوف ماني على بالك=من عقب يومين تفطن لي


فضه الحمود العنزيه

الشاعره فضه الحمود العنزيه سمعت ان شاعر يقال له ابو حمود المطيري

قال قصيدة هجاء في احدى النساء فقالت تدافع عنها :



يا ابو حمود ادمح الزلات = واللي بقا يا الله التوبه

حنا بها علينا مدارات = والا الرجل ينقل عيوبه

تراك ابو غوش وبنيات = وادر المناقيد وعقوبه

عرضتهن هرجة الشينات = شبن على الكبد لاهوبه

ما اثني كلامي عقب مافات = هرج القضا ويش ماجوبه

رحلت فضه الحمود مع زوجها الى مدينة طريف فلم يطيب لها المقام

فقالت :


لا عاد يومٍ نزلت طريف = زود همومي وغربالي

اطلب عسى ديرتي للريف = وديار شوقي للامحالي

لوكان هم يكرمون الضيف = ما ديار خلي على بالي

القلب به مثل مسطى السيف = ما اجرح شفيقٍ على بالي


حصه العنزيه

الشاعره حصه العنزيه تهجو فتياناً من قومها لم يتحملو المشقه
والتعب في كسب الرزق فتقول :


يا عيال يا طول عنوتكم = نصف الشهر ما تمضونه

خسارةٍ بس روحتكم = مع راعي (الفرت) تتلونه

جيتوا وهي ماتحرتكم = ترجي الفوايد تجيبونه

حصيلكم بس كروتكم = والزود للشوق صابونه


زوجة عمعوم الرويلي

زوجة عمعوم الرويلي تنصحه عن شرب الدخان وتقول :


عمعوم لا تشرب من التتن مره =احذر ترى شربك من التتن يدمرك
عندك مجاهيم تقل لون حره =وبيتٍ كبير وضامر البطن ينحرك
ومهيرةٍ بنت العـــبيه نبـره=ومشلشلٍ عود البلنزا على ظهرك
وخطو الولد لو جاك مابه مسره=اللي اليا كبــرت علابيــه وخـــرك
ان كان ربي ناوين لك مسره=انزل لك اسباب الأقدر واظهرك
وان كان ربي ناوين لك مضره=لو كنت في عالي الشخانيب حدرك


نوره الحمود الظفيريه



يـالله ياعـالــم ماقلت = تفـرج لحـال الظفيريه

ليا قيل هل العـمـر حزنت = هاذي سواة العمر فيه

انا بطرد الهوى غربلت = غربال يوسف وانا حه

لولا معي من عشيري بنت = عانقت من هو ضرب نيه

دام اللحد ما حـفـر ودفـنت = انا بخلـي رجـاويه

البلد سالت وانا ما سـلت = دايم عيوني شقـاويه


هذه القصة اختلف الرواة فيها فمن الرواة من نسبها للشيخ مشعان بن هذال ومنهم من نسبها للشيخ عبدالله بن هذال،
وتتلخص في أنه كان يشرب الدخان (التنباك) وكانت زوجته تتضايق من رائحة التبغ وذات مرة
وهي جالسة لوحدها عبرت عن رأيها في الدخان بقولها هذا البيت الذي بدأت تترنم به في بيتها
وهي لا تدري معتقدةً أن لا أحد يسمعها حيث قالت:


يا شارب التنباك شاربك لا طال =اياك وإيـا واحـدٍ جـاز دونـه
مادام به نقصٍ على الحال والمال= ايضا وشرّابـه يدمّـر سنونـه

فوقع هذا البيت على أسماع زوجها فنهرها والغضب يتقـد في عينيه بقوله:
ماذا تقولين ؟
فاستدركت ذلك وأردفت قائلة :


شرّابة التنباك فيهم سعة بـال= واللي طويلٍ شاربه يقصرونه
يستاهل التنباك مثل ابن هذال= اللي يصرّه في مثاني ردونه


لولوه العبدالرحمن الفهيد

شاعرة من اهل العين تحث زوجها بالمشاركه بالمعركه مع قومها وبمساعده جيرانهم قبيله مطير ضد سند الربع الذى غزاهم واخذ حلاهم فتعذر بالمرض فهجته قائله :


صاح الصياح ومن على السطح طليت =واشوف شوقي مع جلوس العذارى

أشوف شـــوقي جالس بأوسط البيت =مامرة يفـزع عطاه الكسـارا

النفس شامت عنه واقسمـت واليت=رزقي على المعبود مغني الفقـارا

شفي مع المطران كسـابة الصيـت =عيال الفهود أهل المـهار السكارا

فكوا قصـيرتهم قـــرارا بتثبـيت=بعريق بلعـوم ارخصـوا للعمارا

سند وقـع من بينهم طايح ميت=واللي سلم منهم على الوجـه نارا


ساره الهليل

ساره الهليل تزوجت رجلا مكثت عنده مده ثم نشزت عنه كارهه له
وقالت تهجوه :


خطو الولد يزعل اذا ماتعشى = ويضحك اذاان ملا بطنه الزاد
ماتلتلنه مبعداة المعشى = ماجرب الغربه ولامرة ٍ فاد
لاواحسايف جيبى اللى تنشى = وارخصت له فيما مضى كل ماراد


سوده من بنى رشيد

كان لها زوج يسمى بن ملهاب وكانت تحبه كثيرا ولكن اخاها يكرهه
اقسم عليها بان تقاطعه فأطاعت امر اخيها كارهه مجبوره وذات يوم مر بها زوجها وسلم عليها فقالت له :


ياصاحبي جنّب عن الدرب لاهنت =ترى ماهي بعلومك الماضياتي

اقسمت لك بالله ماقط لك خنت =عليك ريقي مايبل الشفاتي

لاشك اخويه قال عيفيه يابنت = وحرم على ملايمك فى حياتى

وعندما طلقها قالت :


ياصرخ قلبى صريخ الباب = لاحركه واحد ٍ عجلى
عليك ياولد بن ملهاب = لا واحلالاه يارجلى


ظاهره الشراريه

ممايحكي ان امراه من الشرارات تدعي (ظاهره)سكنت في جوار رجل يقال له (خليف) من اعيان اهل الجوف وذات يوم باعت شاة على جماعه يقال لهم (السبيله)ورفضوا ان يدفعوالها الثمن فما كان منها لاان استنجدت بجارها(خليف) تحثه على استرجاع حقها بهذه الابيات :


ياخليف عيوا لايجون السبيله=عيوا معي للشرع يا خليف يمشون
الحق ظلما والمصقل دليله =ولاتنقضي حاجات من يتبع الهون

لما سمع خليف كلامها نهض من فوره وحمى جارته واستقاد لها حقها .

وللشاعره ظاهرةايضا عندما طلب عبيد بن رشيد من اهل الجوف الغزو معه باسم الجهاد وقد رقت لحالهم لعدم قدرتهم على تحمل مشقة الغزوفقالت :


ياعبيد راع الجوف سوى الاشده=واقرد عينه وين ودك توديه

ياعبيد راع الجوف راعي مكده =وان حارب العربان ضاعت سوانيه

ولها ايضا في ابنتها المسماه (واجده)وقد نبغت في الشعر واخذت تفد على الامراء فغارت منها امها وقالت :


ياعبيد وحده من بناتي كوتني =كوي المريض اللي تجدد مكاويه

عرفتها الحكام لين اغلبتني =العفو كيف الكلب ياكل مربيه

لاواحسايف نقلها فوق متني =غير الرضاع اللي لجسمه يغذيه


وضحا الدخيل العواد

رأت في يوم من الأيام أن الدلة مركات على النار إلى جانب قدر الطعام فقالت تحاور الدلة :

الدلة :


عقب ماهو مركبي قدم الرجالي =قمت انقّل من محل اليا محلي
صرت من حسبة قدورك عزتالي =ول ياعصر الفلس جعلك تولي

وضحا :


اصبري في صبرنا والعمر بالي =آه واويلاه ياعصور مضىً لي
ما جرى لك يادلالي قد جرالي =والليال اللي مضن لك قد جرىً لي

الدلة :


يوم انا محشومةٍ قِدمِي مزالي =ونجر ماوٍ يدعي الغادي يدلي
ما حلا الفنجال بايمان العيالي =بين شيبانٍ وشبانٍ تسلي

وضحا :


ياعزيز الشان يا منشي الخيالي =ارحم اللي دمعته دلت تهلي

كيف هيضتي جروحي يا دلالي =اسمعي يادلتي والا فولي

الدلة :


ما سمعنا لك وعندي لك نكالي =باشتكيكم والمحاكم لي تحلي

كيف يام حسين ما ترضينها لي =كيف اشوف الغبن واسكت واستهلي

وضحا :


الشرايع ما تقول الا العدالي =وكل ما قالت بشرعه جايزٍ لي

وان شكيتيني هجرناكم ليالي =من ابريق بالترامس نا نزلي

الدلة :


الترامس ذوقها ما هوب حالي =واعسى كل الترامس فدوةٍ لي

إشري الرسلان لو هو كان غالي =واركي الدله وبالرسلان زلي



شاعرة مجهولة

تناشد زوجها إصلاح أمره في كثرة الأسفار والغياب بحثاً عن الرزق :


إلى متى راحت حياتي وانا ارجيك =الله لا يقطع رجاً بك رجيته

لو شفت دمع عيوني اللي تراعيك =هلت على المكتوب ساعة قريته

إن كان جا مستقبلك مثل ماضيك =أقول يا خلاف سعيٍ سعيته

وان كان تبغيني مثل ماني ابغيك =لزوم تاطا بالوعر ما وطيته

وان كان حال الياس دون الرجا فيك =أقول ذا ذنبٍ لنفسي جنيته


الشاعره ذكر بنت شويحط الشمريه

قصيدة في ابنها دهش تأخر وطال غيابه في سفره وصارت تتحسس اخباره من المارين المسافرين :



نطيت انا راس ملمومه= وادموع عيني ذواريفي
ارقب على اللي ورى الحومه= اقفا ولا من مصاريفي
قمت اتنشد عن اعلومه= راع البكار المواجيفي
والنجر عقبه على نومه =هو والدلال المهاديفي

وايضاً لها توجد على ابنها دهش عندما طول غيابه :


لايادهش علمي بكم بالضحيه =واليوم هذا التوم بين هلاله
ودموع عيني سيلن الشغيه =مثل صبيب السحب سود خياله
البارحة عيني عن النوم عيه= حتى ضحى اليوم مما جراله
عقلا وربعه لارمتهم بسيه= حين اركبوني يوم طول محاله
هو راعي اللزمه وراع الحميه= امزبن المضيوم واللي عناله


حصة المحمد الفوزان

وتنتمي الى قبيلة عتيبة نشأت في قرية الخضيرا القريبة من بريدة لها قصيدة مشهورة عبرت فيها عن معاناتها من سفر ابنها مع العقيلات تقوله فيها.


يامحمد روحت في الزمل ملحاق=وبعدت عنا يا ظنينة فؤادي
من اول ترجي تجينا من اوراق=واحسب الأيام عدد عدادى
لولا الحيا صبيت صوتي بالأشواق=اكالمك واصيح ثم انادي
طلبت انا من المسبور سماك الاطباق=حيثه رب وفوق العبادى
يلطف بحالي اللي ضعيف ومشتاق=ويطير من قيله سواة الجرادى
بقر عيني بك ولابيك تنعاق=عساي اشوفك لافي بالبلادى

زينب المحمد

ولدت في الرس واشتهرت بكنية والدها "مخراق" أي شديد الكرم فكان يطلق عليها مخراقة..
وهي تفتخر بهذا اللقب فتقول:


ان قيل مخراقة فلابه معيره=عمهوجة تزهي جديد المياديج
الى اقبلت مع ناسمات الجديلة=ماهيب من خثل البطون الجوابيج

برعت زينب في قول الشعر وكانت غزيرة الانتاج إلا ان معظم شعرها ضاع لأنه لم يدون.
لها قدرة على تصوير احاسيس المرأة في مواقف حياتها المختلفة وحين تزوج زوجها عليها قالت:


سيرت ابنشد سالم كيف ودي=الطارش اللي غايب له زمانين
قال إن شوفك عن علومك يصدي=من يمكم ماهوب طلق الحجاجين
تزوج له وحدة له يكدي=وانتي يبيك الى رسة المعاطين
تهت الطريق وجيت انا سوق سدي=غديت ما اميز طريقي من البين



المصادر :

1- شاعرات من الباديه – عبدالله بن محمد بن رداس

2- مصادر اخرى متفرقه

[خالد الذيابي]

الاخ احمد السندي


قصائد رغم مرور الزمن عليها الا انها ظلت متداوله بين الناس
وهذا دليل على قوتها وجزالتها


شكرا ابو انور على هذا النقل الاعداد الاكثر من رائع

[احمد السندي]

الاخ العزيز خالد الذيابى لك منى جزيل الشكر

[احمد السندي]

تفعيل الموضوع

[احمد السندي]

موضوع يستحق القراءه

[احمد السندي]

وين محبى القصيد مااشوف ردود .... موضوع استغرق اعداده وتنقيحه شهر

[احمد السندي]

وين محبى القصيد مااشوف ردود .... موضوع استغرق اعداده وتنقيحه شهر